Mużajċi

l-ewwel pipa

2012-01-03T16:38:00.002+01:00

Fl-aħħar xtrajt il-pipa.

X'jolqotni fiha ma nafx eżatt. Norbotha ftit mal-imħabba li għandi għall-kpiepel fedora; għall-qomos bil-kmiem twal; għall-flokkijiet iddisinjati bl-argyle, bl-għenuq forma ta' V; għall-films black and white siekta; għall-mużika ta' bejn iż-żewġ Gwerer; għar-riħa tal-kotba ġodda jew użati; u għall-iljieli nqaxxar id-dinja ta' madwari saff, saff, idealment ma' tnejn, tlieta, jew erba' bħali.

Inqisha xi ftit ukoll bħal inbid tajjeb, imlewwen b'saffi ta' fragranzi u togħmiet li tieħu l-ħin biex tifhimhom. Ma jgħoddx kemm tixrob, imma x'tixrob u kif tixorbu. Il-proċess jitlob kurżità.

Mal-pipa hemm ritwali x'tosserva. Ma tqabbadx il-pipa ta' malajr, għal żewġ nifsijiet, bħas-sigarett.

Is-sigarett iż-żewġ pastizzi li taħtaf meta taħrab kwarta mix-xogħol bil-moħbi, bl-istonku jwerżaq il-ġuħ.

Il-pipa l-ikla gourmet ta' fl-għaxija, paċenzjuża mat-togħmiet moħbija, bix-xemgħa tnemnem dawlha, tixgħel il-ħmura tleqq tat-tazza tal-inbid.

Dik hi, il-pipa: il-kalma meqjusa; tintelaq fiha. Taf tkunlek l-oġġett u taf tintiliflek fl-isfond.

Ix-xirja għamiltha m'għand il-Kaptan Caruana, ta' Strada Forni, il-Belt Valletta. Ma nistax naħseb f'ħanut iktar addattat: toqba, bl-ixkafef stivati puliti bit-tabakk, bil-pipi, bis-sigarri, u bis-sigaretti għall-bejgħ. Spjegajt lill-Kaptan li din hi l-ewwel darba tiegħi. "Ma nifhimx akka", għedtlu. Il-Kaptan balluta xwejħa, bil-qmis bajda immakulata u s-sidrija skura spjanata, idaħħan is-sigaretti fil-ħanut, jitmejjel mil-liġijiet li ġew tard wisq fil-medda ta' ħajtu biex jibdluh. Bil-paċenzja spjegali x'għandi bżonn u nofs siegħa wara kont partatt tletin ewro ma' pipa ġdida, tabakk, u xi għodod biex nieħu ħsieb l-akkwist il-ġdid.

Intfajt mal-kantuniera tat-Teatru Manoel, nimla' l-bokka tal-pipa bit-tabakk imfewwaħ, riħa ta' vanilja u passolina, ħerqan u kurjuż ħa nqabbad l-ewwel nifsijiet.

grokk!

2011-08-20T10:44:00.015+02:00

grokk
għall-grigalata
friegħi frosta
laħam flieli
qatgħat
fil-ksieħ
immelħin
imdemmin
imdennin

grokk
għalik
għadek hawn
imħażżem
farretti midalji
stojku
awtentiku
b'subak tan-nofs
tisfida
riżolut

għalik, għerwien

2011-07-05T22:59:00.029+02:00

il-kliem maħmuġ
naħsluh
u nbilluh fl-għasel
bħall-ixkumvat

għaliex għerwien
iwerżaq wisq
u aħna
l-kliem
irriduh ħelu
għax qares
joqros wisq

fakriet

2011-05-03T18:58:00.032+02:00

kultant
ix-xrar minsi
taħt il-qoxra
jitkebbes
u jgeżwirna
għal mument
fil-ħelwamorra

sakemm
l-għata terġa' tgħib
u magħha ddub il-qoxra

ninkixfu
nerġgħu
mill-ġdid
nitilfu

Ħajku 48

2011-05-03T18:24:00.005+02:00

il-ħsieb għaġina --
jintgħaġen bil-paċenzja
u jogħla waħdu

fid-dinja, tad-dinja

2011-04-07T13:17:00.005+02:00

Kewni
fid-dinja,
tad-dinja.
La nintemm
tintemm id-dinja;
la d-dinja tintemm
nintemm jien.

Ħajku 47 - ħajja

2010-10-12T11:40:00.033+02:00

banju silġ, labar;
sajjetta; mix-xejn għall-kewn
fil-kewn; lur' għax-xejn

Tanka 8 - ħajta

2010-10-10T11:15:00.017+02:00

idur il-magħżel,
u tinseġ ħjut imwaħħad...
possibiltajiet,
għażliet... u l-ħajta tiġri...
torbot, tgħaqqad, taqta' s-skiet

ċajta

2010-10-07T21:15:00.011+02:00

iqandel
'il-ħajja lejn il-quċċata
biex,
met' għoddu wasal,
tiżloqlu w titgerber
għal isfel
u, bħall-kurnut,
jerġa' mill-bidu,
iqandel
'il-ħajja' lejn il-quċċata

ċirklu

2010-10-03T05:45:00.015+02:00

kompli aqdef bil-monoċikletta...
qalbek miksura, ruħek minxura,
l-applaws jirbombja;
karikatura...

kompli aqdef bir-rota, f'ċirku,
faqqa' ċ-ċajt,
mogħmi bl-għaraq
żlieġa mal-patina ma' wiċċek...
id-dwal jgħammex,
l-istorbju jordom...

kompli aqdef, ħalqek mċarrat,
gandott fin
mnejn ruħek tinqata'
w tfexfex għaliha,
sakemm id-dawl jiskot,
iċ-ċirklu jorqod,
ir-rota tnin...

ċirku

2010-10-02T23:55:00.002+02:00

ċiklu

2010-10-02T23:07:00.016+02:00

sakemm nfetħu għajnejhom ma' lwienhom u, ftit ftit, tgħallmu jtiru, imġienen għall-ħarba. Segwihom; għall-ewwel minn ħdejhom, sakemm, ftit ftit, tbiegħdu wieħed wieħed u telqu; telqu w ħallewh rassenjat li ħidmietu spiċċat.

Il-ħelsien sikru fih sakemm, wieħed wieħed, rabbew l-għeruq fejn wassalhom ir-riħ, u, ftit ftit, bdew jifhmu ħajjet iċ-ċirku w ċirket il-ħajja, il-mewġ iħabbat, it-taħbit tar-riħ, tlugħ u nżul ix-xemx, iċ-ċiklu ma jintemmx,

Au revoir, forsi

2010-09-29T21:51:00.370+02:00

Qed jaqleb Novembru;
ix-xita bdiet tiżfen mar-riħ;
il-ksieħ tal-iljieli jitgħannaq mal-jiem;
l-iħirsa tas-sena jinġemgħu
fil-vini mkiddin.

Sa ftit taż-żmien ilu,
għax-xemgħa u l-qamar,
ħallejna isimna fir-ramel;
il-mewġ, bl-akbar heda, dewwibna w għasfarna;
erġajna tħallejna, u reġa' ħassarna -

naqqaxtek fi driegħi b'musmar;
xrobtlok demmek
biex miegħi inżommok
ħa nbaħħar il-qalba fit-temp,

u ismek baqagħli farrett, ifakkarni
kif belgħek il-mewġ,
kif geżwrek iċ-ċpar,
kif ħallejtli l-bagalja miftuħa
w biljett solitarju bi tmiemu miftuħ,
ħa nagħżel it-toroq li,
waħdi,
għal għonqhom sa mmur.

U jien irħejtilha.

Au revoir, forsi jkun,
la t-temp jerġa' jdur
u t-toroq, xi darba, f'salibhom jiltaqgħu
la jgħibu ix-xita u s-silġ ta' dax-xhur...

Ħu ħsiebek! Ħallejtek!

Saħħàra

2010-08-29T16:48:00.018+02:00

Saħħàra, saħħartni, bħal Shakespeare; blajtni, bħal Rużar;
hewwajtni w hemmejtni, bħan-noti ta' Chopin. L-
arloġġ, għal ftit, waqaf, sakemm il-lejl boloq,
riġlejn Nureyev telqu, Matisse dbiel u
Ovide ntesa. Saħħartni, għal ftit, u
niffistni.

dittatorwelljana

2010-08-18T12:44:00.039+02:00

wara żjara fit-totalitarju

fjuri biss għall-omnipreżenti;
imbissem iżejjen il-ħitan;
ma jaqlax għajnejh,
għajnejh liżar;
kulħadd imħares,
kulħadd imgeżwer,
kulħadd taħt il-lenti

l-anġli delegati
jħufu bla qatigħ
benevolenti
biex
ħadd ma jidneb
ħadd ma jikser
ħadd ma jilwi...
ħadd...
ħlief fis-skiet ta' qalbu

u jekk l-anġli jindunaw
jiżguraw li l-għolliq u l-ħurrieq jitneħħa baxx baxx
u jintesa
daqs li kieku qatt ma kien

jitħallew biss
il-fjuri jkomplu jfewħu,
anke jekk artifiċjali -
banali, konvenzjonali -
fjuri biss għall-omnipotenti

ċajta

2010-07-30T09:57:00.018+02:00

idħaqli bit-twemmin
ħa nidħaq b'tiegħek
u flimkien
nogħxew bid-daħq,
inċarrtu ħalqna
widn' għal widna
f'lewn il-ward,
sakemm qalbna tbatti tħabbat

...biss, kultant, tieħux wisq għalik jekk xi ftit nieħu għalija,
ninjorak, ndawwar wiċċi,
ngħid kontrik,
nsoddlok ħalqek,
niżolak, nheddek, naqflek, neżiljak,
nidfnek ħaj,
nifirdek minn rasek,
nonxrok imsammar, inniffdek,
ngħarrqek, ngħallqek, naħarqek, nħaġġrek, nħanxrek,
niggassjak,
nisparalek,
nisplodik,
ningassak...

taf int,
teħodnix wisq bis-serjetà,
ħa nkomplu nidħqu

Tanka 7

2010-07-19T14:00:00.005+02:00

jiddejjem, jiqsar,
jixxejjen, jitwal, jogħsfor,
jiġri, jmut, jeħel,
jgħib, jillajma, jitgħażżen,
jintemm, jitgerbeb, il-ħin

Tanka 6 - tankaħolma

2010-07-17T14:06:00.077+02:00

ngħalqu għajnejna...
ninqatgħu 'il fuq, fejn il-
qalb m'għandha ħakem
ħlief lilha nfisha... 'il bogħod...
'il bogħod... 'il bogħod... 'il bogħod... 'il...

Ħajku 46 - ħajkuħolma

2010-07-17T13:45:00.005+02:00

f'ħolma l-univers
insawruh kif nixtiquh...
nitfuh, nixgħeluh

Lil Duschamp, Warhol, Cage u Hirst,b'tislima ta' rispett mis-swar Maltin

2010-07-12T08:10:00.015+02:00

"~'aqq Alla~"

Santa Marija

2010-07-10T20:03:00.173+02:00

Reġgħet, il-bajja, mballata bil-foki
eżiljati mir-rutina, għall-mistrieħ,
f'Santa Marija.

Il-mobile ftit għejjien illum biex itella' l-aħbarijiet;
intlift fix-xefaq
idendilli l-istedina, telfa fih... fil-bogħod, fil-kwiet...

Ponn ramel jaħsadni.

"Sorry!" - tidħaq tfajla fi grupp ta' sitt sireni
li ma ilhom xejn li xbejbu...
sormhom ħawħa, bi tbissima felli qamar...
u l-maskji Alfa, bil-logħob territorjali,
jaqbduhom
ħa jġorruhom u juruhom x'inhi l-imħabba...

"Tfajla ta' Tlettax Titlef Ħajjitha"... tittajjar minn żagħżugħ
li ħassu king għax għandu liċenzja.
Awwissu jbaqbaq u s-sewqan mingħajr paċenzja.
Mifxul, ittanta jibqa' sejjer
u nfaqa' m'arblu;
inħareġ mill-karozza minn missierha mitluf,
li ċempel 'l-ambulanza,
li ħadet lis-sewwieq qabel it-tifla,
li mietet ftit wara, f'dirgħajn missierha ssummat,
fuq il-bankina.

"...Qabda Rekord Eroina..."

Sadattant, ta' ħdejja biċ-ċinga maħlula
u l-ħabib, jew x'iż-żobb hu, iġerri jdejh ma' dahrha aħmar,
imexxilha l-krema bajda
biex ma taħraqhiex ix-xemx;
u jien imsaħħar.

"LE Għall-Kontraċettivi!"
Sawm u astinenza - bla ċrieket ma nħallukx taħleb l-essenza. Żommha fik.
U għat-tqala ma hemmx assistenza.
Għal mument Marx jidħaq, f'qabru,
b'idu l-leminija jifforma "L" fuq moħħu.
"Losers! Nagħaġ! Telliefa!
Komplu niffsu l-opju tal-ħarriefa!"

Opju...?...

"Ħalla Sebgħa U Erbgħin Mejtin"
...wieħed għal kull biċċa minn imsarnu mferrxin
ma' kullimkien;
ġabruhom bil-pala mis-suq fil-pjazza,
fil-baħar ta' demmu ma' ta' sebgħa u erbgħin omm, missier u wild maħsud.
Kapuljat.
...u wieħed għal kull verġni tistenna n-naħa l-oħra...
eternità għal dejjem ta' dejjem...
"...Sebgħa U Erbgħin Mejtin" bit twemmin... agħar mill-bhejjem...
"Allah hu akbar! Allah hu akbar! Żobb Allahi akbar minn żobb Allahek!"
...ikbar minn tiegħek żgur, issa, ja ħabibi, wara li żżelliġt mal-pjazza...

Tifel ċkejken, jiġri għall-ballun,
faqa' flixkun
moħbi fir-ramel
u, jixher, qed igeżwrulu xugaman ħa jżommulu ftit id-demm.
Sakemm ommu u missieru bil-ħarba jiġbru li hu tagħhom
ħa jaħarbu bih l-isptar,
zitu żżiegħel bih, tipprova ssabbru, b'sidirha ffurmat iħabbat ma' wiċċu,
u t-tifel iktar jibki
- b'siequ miftuħa ktieb u x-xugaman jegħreq fl-aħmar.
Sas-Sajf li għadda kien għadu tarbija.

"Mimlija, l-Bajja, Sa Ruħ Ommha,
f'Santa Marija"

Lourdes

2010-07-09T13:30:00.074+02:00

flimkien
l-eluf inemnmu
au flambeaux
jittalla' t-talb imgedwed
lotterija
lejn is-sema,
jixxabbat
lejn il-Qalb tal-univers
qalbu ttamata li jinstema'

u sadattant
ma' kull "Qaddisa" spissa tal-eluf
tissikket darb' għal dejjem
tarbij' oħra
mġewħa
maħqura
anonima
għax titlob għadha ma tgħallmitx
u li għaliha
l-Ġenna rat għeluqha f'tarf il-ġuf

użin

2010-07-06T23:19:00.012+02:00

quddiem għaxar miljun kelma
jdendlu lsienhom
b'qima ta' 'nkoronazzjoni
f'rit beżlieq b'venerazzjoni

quddiem għaxar kelmiet qsajra
jqarrsu wiċċhom
u jaqtgħuha li l-kelliem
għad ma rabbiex is-sens tal-kliem
imma, mifxul, ħabat mat-tmiem

agħar mid-dell

2010-06-28T08:35:00.089+02:00

Fil-għama nitgerbu fis-sħab, 'il quddiem,
bit-toqla tal-imgħoddi mal-għekiesi;

u l-issa dejjem magħna, agħar mid-dell
jobromna
w jaħarbilna...
jiddieħak,
jitnejjek,
għax qatt ma mmiddu jdejna kollha fuqu.

मौन (skiet)

2010-06-05T14:54:00.036+02:00

iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
iskotiskotiskotiskotiskotiskotiskotiskotiskotiskot
u tisma' l-eternità

leħħa ta' mument

2010-05-31T14:25:00.140+02:00

F'leħħa mħarħra ta' mument
għalaqt għajnejk
u għebt quddiemi,
b'ċajta funebra, ironika:

jiżżewwaq
il-ferment tal-ħajja tagħna
bid-diqa
tat-torment t'għeluq ħaddieħor.

Tbissimt
għal leħħa mitlufa ta' mument
sakemm bkejt
u komplejt
il-mixja
b'tiżwiqa
ħelwa-morra,
b'barżakka kemm kemm itqal.

iddur il-pellikola

2010-05-29T11:27:00.068+02:00

iddur il-pellikola
għalina wkoll, in-nies bla wiċċ
li lbiesna ma jgħajjatx;

li mat-twelid tpoġġejna
direttur, attur, udjenza,
quddiem nett
mal-liżar tal-kuxjenza
ta' ħajjitna;

li fi ftit żmien
ser nintesew
bħan-nefħa ta' nifs sħun mal-ħġieġ fix-Xitwa;
nevaporaw u x-xemx tibqa' titla'
għax trab konna w trab insiru;

imma, għalissa,
iddur il-pellikola

Ħajku 45

2010-05-25T21:41:00.026+02:00

baga f'wiċċ il-mewġ..
daqqa fuq u daqqa taħt,
tbaħħar l-ilmijiet

festa

2010-05-23T12:14:00.085+02:00

il-Qaddis
fuq pedestall
ta' banda, birra, logħob tan-nar
daħħlilna siequ feles
spalankalna
bieb il-Ġenna
li xtrajniha
b'ġabra bieb bieb
u b'demm il-Martri
- "Jagħtih il-mistrieħ" -
mqatta' biċċiet
mid-delizzju
u dritt ra wiċċ il-Ġenna
b'wiċċu fis-sħab
fuq is-santa
taħt il-Qalb ta' Kristu
mbissem,
forsi ftit imbikkem,
għax dis-sena
tan-naħa l-oħra
l-ġabra kienet akbar

għożża

2010-05-23T11:16:00.018+02:00

fetħet,
fewħet, lewnet
meta nżergħet;
ix-xita sqietha,
ix-xemx temgħetha,
l-iljieli dewquha l-kenn,
is-satra, l-hena, l-għera, l-għata..

bix-Xitwa, bil-kiefra Xitwa,
fjurha għeb;
ħaraqha r-riħ;
zokkitha xrief, mikul, immarrad

għeruqha biss baqgħu;
midfunin, mifruxin;
mafkar ta' meta darba, darbtejn, warrad

Ħajku 44

2010-05-13T12:11:00.029+02:00

u kemm-il darba
s-sillabi jispiċċawlna
qabel naraw it-

Ħajku 43

2010-05-12T00:11:00.007+02:00

Loqma f'wiċċ l-ilma;
jiġri l-kurrent 'il quddiem,
f'mogħdijiet ġodda.

Aħna

2010-05-09T10:43:00.033+02:00

jiena, inti
leħħa
fl-imżewqa rakkonti tal-Bniedem;
il-Bniedem qatra
fil-baħar imqalleb tad-Dinja;
id-Dinja tikka
f'mixgħela fl-immens tal-Ħalbija;
l-Ħalbija traba
fil-kobor bla tarf tas-smewwiet

U xorta nħossu li l-ħolqien
qed idur magħna.

feniċe

2010-05-03T00:31:00.003+02:00

     feniċE
    feniĊ
   fenI
  feN
 fE
F

Ħajku 42

2010-05-01T20:23:00.028+02:00

Fewwaħ, is-sagħtar,
maġenb widnet il-baħar,
u sama' ċ-ċafċif.

Kantaliena

2010-05-01T15:25:00.011+02:00

u jitla' w jinżel,
iċ-ċafċif,
u jitla' w jinżel;

jiġu u jmorru,
il-jiem tal-ġimgħa,
jiġu u jmorru

bħall-istaġuni;
imorru w jiġu
bħall-istaġuni

u x-xemx u l-qamar;
jaħmu u jberrdu,
ix-xemx u l-qamar.

Waqgħet hi, mrammti!
W'erġ'ibni!, qallu,
w'erġ'ibni mrammti!

'mma l-knaten għasfru,
b'miljun ċafċifa,
il-knaten għasfru..

iċ-ċafċif ġarrhom;
ix-xemx kiddithom
u ċ-ċafċif ġarrhom

u baqa' r-ramel;
fejn kien it-tafal,
baqa' biss ramel

għat-taħlita.

Ħajku 41

2010-04-29T10:37:00.038+02:00

Bi ftit riħ intfiet
u ħalliet serbut duħħan
riħa ta' xama'.

Tanka 5

2010-04-27T12:41:00.006+02:00

Max-xamma ħarab
b'deni qawwi għat-trofew
tal-ewforija
biex meta, fl-aħħar, laħqu
l-aptit parpar band'oħra.

Taħna

2010-03-27T11:19:00.611+01:00

ħrabna
għall-arja
mill-moffa ġenniena
w l-għajat
tal-passat
u t-tradizzjoni

ir-rota bdilnilha l-kulur

meta ndrat
tqallibna fis-sodda
mas-superstizzjoni
bħall-ħmira u d-dqiq
u twaħħadna;
r-ribelli libbsuh il-ġojjelli
meddewh artal
libbsuh mantar
u reġa' ġie mgħammed

Galassji w mewġ il-moħħ

2010-03-16T20:26:00.093+01:00

Ir-Ramla, fix-Xitwa,
battala
‘mma fiha jitkebbsu,
ġo moħħi,
għexieren ta' ljieli
għaż-żiffa
Sajfija,
nitkellmu dwar kollox:
is-sema, l-art, l-ilma,
dwar l-ivvjaġġar bla nifs tal-kontinenti,
l-evoluzzjoni, l-ħajja, w jekk hemmx milja.

U mgħaġġba, fis-sema
nintilfu
b’għajnejna, inħufu
mal-kwiekeb,
biljuni ta’ kwiekeb
imkebbsa,
dejjiema,
jiftakru minn kollox;
u, tgħid, minjaf x’jgħidu
bejniethom, f’dak il-baħar ta’ stennija
sakemm jaslilhom, bħalna, filgħaxija?

Tanka 4

2010-03-16T13:00:00.004+01:00

Il-ħolm ambizzjuż
u storbjuż taż-żogħżija,
rebħ u suċċessi,
postu ħallih lil ġemgħa
kwieta ta' kompromessi.

Ħajku 40

2010-03-15T14:08:00.004+01:00

Nitilqu ntellqu
mal-ħajja u nintemmu
f'tellieqa mal-mewt.

Ħajku 39

2009-12-30T18:11:00.009+01:00

Aktar ma nżidu
fl-età, iktar is-sena
tlebbet biex taħrab.

Rikorrenza dejjiema

2009-11-17T20:49:00.014+01:00

inża',
ħa nifli kull xaqq
bejn ruħek u ġismek -
taqsamlix qalbi
w ma naqsamlekx xofftok
-
rokna mudlama
tbissima beżgħana
twerżieq fis-skiet
tifkiriet
ta' tfulija
ħelwa bħaz-zokkor
imdewwed

Mikrobi

2009-11-17T20:05:00.022+01:00

Mikrobi.
      Ma aħna xejn;
            ħlief għalina w għal mikrobi bħalna,
            insinifikanti;
      ma aħna xejn.

      Nitqatlu,
            avolja wensna mikrobi bħalna,
            insinifikanti ħlief għalina,
      nitqatlu.

      U nieklu 'l xulxin.
Mikrobi.

Tikka

2009-11-17T13:04:00.015+01:00

Fik insib il-għaxqa tiegħi
u fik insib kundann'ti,

inti li
twellidni,
tferraħni,
tbikkini,
tfarraġni
w toqtolni;

wellidtni fis-sħana mwennsa ta' benniena
biex qtiltni fil-kesħa ggassjata ta' Auschwitz.

It-tikka kaħlija ta' Sagan:
tikka minn biljun biljun tikk' oħra,
dik int,
u mikrobu minn biljun biljun mikrobu fik,
dak jien.

U tibqa' int l-imħabba tiegħi
u tibqa' int imrammti.

Ħajku 38

2009-11-15T17:56:00.010+01:00

Kiltlek ilsienek
għax snienek beżżgħuni
jhedduni bil-mewt.

Ħajku 37

2009-11-10T13:31:00.009+01:00

Il-bila bżaqtha
bit-tabella, "Bila Hawn:
Jekk tirfes għax trid".

Skizz

2009-11-07T02:42:00.027+01:00

It-toroq alternattivi alternati li
naħsbu
nfasslu
nippjanaw
noħolmu
jafu jieħdu xeħta fantastika
pjuttost jafu jkunu ħelwin wisq
fl-assurdità fil-bluha tagħhom.

Tanka 3

2009-11-02T15:30:00.009+01:00

Intlift, f'dix-xmara

mgeġwġa ta' kliem ta' fejda;

x'konna qed ngħidu?

Smajtek; moħħi ma jridx u,

xorta, ġismi wisq dgħajjef.

Ħajku 36

2009-10-26T14:59:00.024+01:00

Is-sema mkewkba
mafkar kiesaħ li d-dinja
l-iċken mikrobu.

Tanka 2

2009-10-20T21:02:00.012+02:00

"Aħna xbiehtu,

fassalna", il-Bxara, bid-

daħka, xandruli.

Mela jew artiġġjan fqir

jew l-oriġini dagħwa.

Ħajku 35

2009-09-28T21:54:00.005+02:00

Nitħajjar għax-xejn
spartan materjali, 'mma
mbagħad b'xiex ħa nehda?

Ħajku 34

2009-09-26T17:20:00.009+02:00

Is-sliem għalik, fost
l-għeżeż kontli dejjem u
l-assurd taffejtli.

Tmiem il-ġimgħa

2009-09-23T07:04:00.032+02:00

Dil-magħmudija
xurbana
riħa tal-loppju potenti
tal-Apatija,
mgħottija
b'tapezzerija ta' remettar u duħħan,
is-Sibt filgħaxija.

Infittixni f'għajnejja
w ma nsibnix
ħlief, forsi, f'ħarba
mit-Tnejn,
f'gallarija marradija,
nittawwal
minn wara d-daħna
tas-Sibt filgħaxija
u ma naranix.

Ħajku 33

2009-09-20T01:02:00.007+02:00

Tant għandi xi ngħid
li l-Miklem eżawrejtu;
imbagħad ġie l-ħajku.

Mkien

2009-09-17T13:47:00.188+02:00

Bejn sema u ilma
titbaskat f'imluħek,
titgeżwer fiż-żmien.

Jiltaqgħu, jitwaħħdu
fik, dari u ċ-ċella,
il-bojja w l-għajxien.
-
Interraq band'oħr'
għax inħossni nimtela
bil-ġuħ għall-ħelsien;

nixtieqek, u nsalpa
ħa nerġa' nxomm abtek,
ħa nħossni għejjien.
-
Timbotta w tiġbidni;
bieb nofsu miftuħ -
int, li tiegħi l-imkien.

Tanka 1

2009-09-11T14:50:00.012+02:00

Mhux li kieku l-Kliem,
bħall-Ħajja, jagħraf jagħżel
qabel jitkattar!
Kieku, imma, l-Puliċinell
imut mingħajr ossiġnu...

Ħajku 32

2009-09-07T15:03:00.003+02:00

Fis-Sajf nitkarrab
għax-Xitwa u fix-Xitwa
nittertaq għas-Sajf.

Sunett LX

2009-08-27T20:49:00.048+02:00

L-istess bħall-mewġ li jterraq lejn ix-xatt,
Hekk jgħaġġlu l-waqtiet tagħna lejn it-tmiem;
Kull wieħed b'post ma jiġi lura qatt,
F'sekwenza bieżla jterrqu 'il quddiem.
Il-bidu, mwelled f'baħar ġdid ta' dawl,
Iħakwek lejn il-milja, jdandan klil,
Żvinturi kontra saħħtu jikkonġraw,
U ż-Żmien, li darba ta, jintraddlu qliel.
Iż-Żmien iniffed fjur l-għomor żagħżugħ,
Fi ħniedaq xierfa ġbin il-ġmiel imut,
Bil-kewn safi u rari jsodd il-ġuħ,
bil-minġel kull ma hu jisfa’ maħsud:
Imma 'l quddiem, dal-versi, 'tul iż-żmien,
Jidwu w jerfgħuk, minkejja ż-Żmien kifrien.

Imniffsa minn W Shakespeare, interpretata u tradotta b'dedika lill-Waqu.

Ħajku 31

2009-08-10T21:12:00.005+02:00

Niżżel u Talla',
għal xi għaref, jinkitbu
Dawnlowd u Aplowd.

Ħajku 30

2009-07-29T14:07:00.007+02:00

Il-qisien huma
l-imwiet u t-twelidijiet
li ngħaddu minnhom.

Ħajku 29

2009-07-19T22:29:00.008+02:00

U qisna ninsew
li, bejn l-iswed u l-abjad,
hemm baħar ta' griż.

Ħajku 28

2009-07-06T23:30:00.008+02:00

F'ġirjet il-ħajja
nindiehex mit-tmiem... altru
milli atleta!

Ħajku 27

2009-07-04T15:02:00.005+02:00

Ċertu mużika
taqtagħli biljett dinji
bla ma nitħarrek.

Ħajku 26

2009-07-02T18:00:00.011+02:00

Ħajja għal dejjem
irridha f'did-dinja, mhux
f'Ġenen u mfakar.

Ħajku 25

2009-07-02T07:21:00.004+02:00

Dawwar platt ieħor!
Dalwaqt isir il-ħin u
tintefa x-xemgħa!

Ħajku 24

2009-07-01T21:25:00.007+02:00

Kalċi bl-eliżir:
ċans għal ħajja perpetwa.
Ma nafx irridux.

Ħajku 23

2009-06-30T10:50:00.005+02:00

Xorta tismagħni
meta nitħaddet bilmod;
għalfejn qed ngħajjat?

Ħajku 22

2009-06-24T01:51:00.011+02:00

Din it-tbegħida
ta' driegħ ikkankrat tweġġa'
daqs kemm hemm bżonnha.

Ħajku 21

2009-06-24T00:09:00.013+02:00

Battalja man-nagħas;
nistennik tasal, waħdi,
avolja għalxejn.

Ħajku 20

2009-06-23T18:27:00.007+02:00

Żifna f'tarf l-irdum;
jew nissoktaw bil-bewsa
jew nisktu fl-abbiss.

Neda

2009-06-22T12:46:00.053+02:00

It-tnehida taż-żgħożija sfat minxura;
magħmudija imdemmija
fuq it-tarmak moqli f'żejtu, jġerri lsienu
mal-artal tas-sagrifiċċju inċensat
u insensat
f'qalb id-desert
li qalbu nixfet -

inkorlat,
jarda' l-fatat ta' demm bintu.

Ilsna mqaċċta
f'ism il-Qodos?
B'ism il-Lah?
Miżmumin ma jmurx ilissnu b'espressjoni?
Dan li tat, Rivoluzzjoni?

Epitaffju ta' tmiem it-tmiem tat-Tijatru

2009-06-22T08:01:00.010+02:00

Sebgħin sen' ili niflikom,
nispijakom, nidħaq bikom;

min irid l-eżatt li kont,
min iqatta' ir-rakkont.

Kull mitt bniedem hemm mitt fehma;
agħar minn Babel, dis-sistema!

Minjaf dan hux tarf il-kliem,
hekk kif wasal tmiem it-tmiem!

Ħajku 19

2009-06-18T15:12:00.009+02:00

Ma tispjegalix,
ix-xjenza, għalfej' inħobb
l-assurd bis-saħħa.

Ħajku 18

2009-05-20T22:10:00.008+02:00

Tpoġġejna ġo vojt
li nippruvaw insoddu
b'xama' frivola.

Ħajku 17

2009-05-18T22:17:00.007+02:00

L-assurd sellimli;
"illum hawn u għada le",
sefsifli sielem.

Ħajku 16

2009-04-28T07:48:00.006+02:00

Dendel karrotta
ħa nlebbet għal warajha;
mifjun nistenna.

Sisifu

2009-02-17T21:47:00.015+01:00

Nitla' t-telgħa kollha,
nasal fuq u nerġa' ninżel,
qisni l-iblah,

għax niftakar li bejnietna
kollox suf li jtir mar-riħ u
jagħmel għoqda
f'dan l-istonku
mherri b'xorb u sigaretti;

tlugħ u nżul ix-xemx,
diż-żobb ta' xemx
li tittamani
bix-xinxilli

u jien, b'għajnejn jixgħelu,
nitla' s-sema
b'ruħi w ġismi,
qisni l-Verġni.

Murtal int u mgħannqa ntiru
sakemm issabbatni 'l isfel,
għal ġot-tarmak.

Darba, tnejn, tlieta, bħal iblah,
nitfarfar u nerġa nitla',
nitla' l-ġenna
mgħannaq miegħek,
għax ilqajtni;

ma nitgħallimx li, dil-kukkanja,
is-sorpriża diġa' nafha.

Sisifu tas-sen' elfejn:

dak jien. U int,

Pandora mgħarrqa,

int tniġġiżli ruħi bik,
u żżommh' għaddeja.

Ħemda tqila

2009-02-14T21:49:00.028+01:00

Vrus b'ismek imdeheb
għalik li ttarraxt;

ingħalaqt mir-riħ
u blajt Il-muftieħ

biex la jidħol ħadd,
qas int tiftaħ.

Jiena nistenn' hawn,
bħal ruħ fi flixkun,

nistenna fis-skiet
li jbatti l-inkwiet;

laqqgħalna l-ħabbiet,
għid xi ħaġa.

Ħajku 15

2008-11-13T10:30:00.009+01:00

Imħolli għall-kwiet,
'il bogħod mill-agħa ta' barra,
is-skiet itarrax.

Ħajku 14

2008-11-13T10:29:00.004+01:00

Kelb 'il bogħod, jibki,
imsakkar, maqtugħ waħdu,
ħasadli r-raqda.

Ħajku 13

2008-11-13T10:09:00.004+01:00

Skiet, skiet, skiet, skiet, skiet,
skiet, skiet, skiet, silenzju, skiet:
is-skiet imsikket.

Quddiem fakra

2008-11-11T21:52:00.003+01:00

Li
kelli
nsib duwa
biex, meta rrid,
biha jitkebbsu
tifkiriet imċajpra,
maqfula fil-fond minsi
'mma vivaċi tas-subkonxju,
biex nirxoxta l-ħsejjes, l-irwejjaħ,
l-ilwien bil-qawwa li biha għexthom
wisq nibża' li nniġġiżhom, li nħares
lejhom b'għajnejn dak li jien illum
mhux bl-għajnejn li għexu kollox,
sabiħ jew ikreh, tajjeb,
ħażin, li ma ntilfux
fin-nostalġija
għall-mument ta'
quddiemhom
imma
fih.

Ħajku 12

2008-11-10T15:23:00.015+01:00

tbikkem, l-Antikrist;
ra lilu nnifsu fiha,
l-bhima maħqura.

Ħajku 11

2008-11-10T15:22:00.007+01:00

Tgħid niftakarna
l-istess bħalma nafn' issa,
ftit taż-żmien ieħor?

Ħajku 10

2008-11-10T15:21:00.005+01:00

'rrid nilħaq ix-xemx,
tagħmini, tħolli l-ġwienaħ,
u naqa' 'l isfel.

Ħajku 9

2008-11-10T15:20:00.004+01:00

Mixja fix-xita
għan-nifs maħsul tax-Xitwa;
taħsilni mis-Sajf.

Ħajku 8

2008-11-09T21:54:00.002+01:00

Lejn dak ta' għada,
kemm għadu, u kemm għadda,
minn dak tal-bieraħ.

Ħajku 7

2008-11-08T21:13:00.006+01:00

Tiddili kewkba,
nintilef fiha fit-tul,
nitlef 'l innifsi.

Ħajku 6

2008-11-08T20:59:00.005+01:00

Tiddili kewkba,
ma nintilifx sew, fit-tul,
nitlifh' għal dejjem.

Ħajku 5

2008-11-08T17:41:00.003+01:00

Tgħid fis-seba' jum,
meta waqaf għall-mistrieħ,
x'qagħad jagħmel Alla?

Ħajku 4

2008-11-08T16:04:00.002+01:00

Il-mundan siket,
il-metafora qamet
u telqet timxi.

Ħajku 3

2008-11-08T14:21:00.003+01:00

U jekk il-karba
li tidwi "Mulej, għalfejn?",
tkun tidwi fix-xejn?

Ħajku 2

2008-11-08T14:10:00.002+01:00

Il-mistoqsija
li mwieġba tqajjem mija,
meqjusa mwieġba?

Ħajku 1

2008-11-08T14:09:00.003+01:00

Ħsieb mhux imtenni,
mitluf fis-skiet perenni,
jiġi ħsieb moħli?

Ħolma

2008-11-01T21:07:00.003+01:00

Noħlom
b'wiċċek,
b'għajnejk,
b'xagħrek,
b'xofftejk,

b'ismek,
b'idejk,
bik miegħi,
b'jien ħdejk,

bit-telfa
f'xulxin,
bin-namra
bla ħin,

bil-qofol
tal-jien
milħuq
għax flimkien.

Imma, Ġuża,

int ħolma.

għabex ir-ruħ

2008-03-21T17:13:00.001+01:00

Mir-raqda
qamet
għax swaba
messewha,

w bil-qajla,
mhux mejta,
f’kuluri
li jpassu

infetħet
u tmattret;

rat lewnha.