Ħajku 15

Imħolli għall-kwiet,
'il bogħod mill-agħa ta' barra,
is-skiet itarrax.

Ħajku 14

Kelb 'il bogħod, jibki,
imsakkar, maqtugħ waħdu,
ħasadli r-raqda.

Ħajku 13

Skiet, skiet, skiet, skiet, skiet,
skiet, skiet, skiet, silenzju, skiet:
is-skiet imsikket.

duwa

Li
kelli
nsib duwa
biex, meta rrid,
biha jitkebbsu
tifkiriet imċajpra,
maqfula fil-fond minsi
'mma vivaċi tas-subkonxju,
biex nirxoxta l-ħsejjes, l-irwejjaħ,
l-ilwien bil-qawwa li biha għexthom
wisq nibża' li nniġġiżhom, li nħares
lejhom b'għajnejn dak li jien illum
mhux bl-għajnejn li għexu kollox,
sabiħ jew ikrah, tajjeb,
ħażin, li ma ntilfux
fin-nostalġija
għall-mument ta'
quddiemhom
imma
fih.

Ħajku 12

tbikkem, l-Antikrist;
ra lilu nnifsu fiha,
l-bhima maħqura.

Ħajku 11

Tgħid niftakarna
l-istess bħalma nafn' issa,
ftit taż-żmien ieħor?

Ħajku 10

'rrid nilħaq ix-xemx,
tagħmini, tħolli l-ġwienaħ,
u naqa' 'l isfel.

Ħajku 9

Mixja fix-xita
għan-nifs maħsul tax-Xitwa;
taħsilni mis-Sajf.

Ħajku 8

Lejn dak ta' għada,
kemm għadu, u kemm għadda,
minn dak tal-bieraħ.

Ħajku 7

Tiddili kewkba,
nintilef fiha fit-tul,
nitlef 'l innifsi.

Ħajku 6

Tiddili kewkba,
ma nintilifx sew, fit-tul,
nitlifh' għal dejjem.

Ħajku 5

Tgħid fis-seba' jum,
meta waqaf għall-mistrieħ,
x'qagħad jagħmel Alla?

Ħajku 4

Il-mundan siket,
il-metafora qamet
u telqet timxi.

Ħajku 3

U jekk il-karba
li tidwi "Mulej, għalfejn?",
tkun tidwi fix-xejn?

Ħajku 2

Il-mistoqsija
li mwieġba tqajjem mija,
meqjusa mwieġba?

Ħajku 1

Ħsieb mhux imtenni,
mitluf fis-skiet perenni,
jiġi ħsieb moħli?

għabex ir-ruħ

Mir-raqda
qamet
għax swaba
messewha,

w bil-qajla,
mhux mejta,
f’kuluri
li jpassu

infetħet
u tmattret;

rat lewnha.